Puisi-puisi Manado: Bode Talumewo (1)

LOVE BLUES (1)

Cinta itu buta
Buta itu gelap
Gelap itu dosa
Dosa itu maut
Maut itu mati

Mar cinta nyanda perna mati!

==================================================

SETELAH KEMEGAHAN ADA KERUNTUHAN

Dorang bilang
‘Setelah kemegahan, ada keruntuhan’

Bos,
Tau diri sadiki!
Jang lupa diri!
Inga kalu ngana so nda jadi ulang,
Pasti dong mo injang!

Jadi inga pa torang!
Jang lupa diri!

==================================================

KISAH TOAR-LUMIMUUT (3)


Kisah Toar Lumimuut
Terkesan aku bila mendengar ceritanya
Kisah nan elok di telinga
Menyatu kalbu karna gembira

Terbuang dari negeri utara
Kerajaan besar nan jauh di seberang lautan

Ingat aku akan ceritanya
Elok rupawan Lumimuut dikata
Tampan menawan Toar dikabar
Jutaan anak termurunnya kini

Aku bangga menjadi turunannya
Aku bangga jadi bagian bangsaku
Bangsaku itu bangsa Minahasa

Bergetar orang kala sebut namanya
Seakan halilintar datang menyambar

Terkesan aku bila mendengarnya
Kisah Toar Lumimuut
Sang Toar datang memadu cintanya
Bundanya datang dan dinikahinya

Terbayang ribuan keturunannya kini
Membesar jumlah anak cucunya
Membesar pula kedudukannya

Kala Toar datang mendekat
Kubisikkan sepatah kata,
sejemput dia terbelalak
‘Opo Toar, dorang bilang kata
ngana da baku cuki deng nga pe mama?
Opo Toar, terus terang kita nae dara da dengar’

Opo Toar tersenyum mengambang
Bersahutlah dia sambil membelai
‘Cucuku, yang penting bukang ngana
deng tape keturunan laeng yang ada bilang itu
Inga jo dorang pe pepatah
Anjing menggongong kafilah berlalu’

Tersenyum aku kala mendengarnya
Leluhurku ternyata maha bijaksananya

==================================================

TAPE KELUARGA (2)

Qta ….
Nama ruma Grey
Nama pergaulan Bode

Qta keturunan kalapang dari Dotu Talumewo dari Langowan
Qta keturunan kalapang dari Dotu Sual dari Poopo
Qta keturunan kalapang dari Dotu Kawatu dari Minahasa Tengah
Qta keturunan kalapang dari Dotu Wawo
Qta keturunan katuju dari Dotu Menayang dari Poopo
Qta keturunan katuju dari Dotu Tololiu dari Sonder
Qta keturunan katuju dari Dotu Rawis dari Pontak
Qta keturunan katuju dari Dotu Mamusung dari Pontak
Qta keturunan kaanam dari Dotu Mamarimbing dari Pontak
Qta keturunan katuju dari Dotu Assa dari Minahasa Tengah

Sori …
Potong cirita dulu!
Dotu Assa, butul kata ngana orang Bantik?
Io so?
Ah … ta nda percaya!
Gila!
Berarti qta keturunan pendatang?
Paya dang!

Ah ...
Nda apa!
Sedangkan Lumimuut dong bilang datang dari utara!
Nda masala!

==================================================

SELAMAT DATANG WOC 2009

Waktu qta lewat
Ada orang dabakumpul
Tu wartawan bule da kroyok pa Kadis

Waktu qta ba dekat
Ta dengar dorang batanya
‘Wat is slogan clin en guvermen sir?’
Malu-malu Kadis hela pa qta bajao
Dia babise pa qta
‘Apa so depe arti?’

Ha …
Takage qta
Mar langsung jo ta bilang
Depe arti …
‘Dilarang ikat sapi di sini,
Karena di sini bukan tempat buang tempat sampah!’
Takage tu Kadis

Ciuttt……..
Dia jalang bajao
Maso di depe ruang dinas
Kong bakunci di situ
Dasar, kadis nintau bahasa inggris
Nanti jo bakudapa di WOC 2009!

==================================================

Itu Malam

Itu malam …
Torang bacirita deng bapuisi
Dengar gitar yang beking rame

I yayat u santi!

27 September 2008
Mawale Movement deng Pinabetengan Muda …
Di Watu Pinawetengan …

Itu malam …
Torang manyanyi deng badiskusi
Deng bunyi mesin motor, depe lampu for kase trang akang torang di terung itu

Chan deng depe toroa’
Green deng depe rekaman kamera video
Fredy deng depe musikalisasi puisi
Andre deng gitar
Kiki deng tamang-tamang Pinbet
Qta deng kamera foto

Itu malam …
Torang baritual di Watu Pinawetengan
10.30-2.30 tenga malam
Ritual manyanyi, diskusi, bacirita deng bapuisi …
Ritual gaya anak muda Minahasa skarang

29-10-2008

==================================================

Minahasa so jadi Bangsa

Satu tana
Satu darah
Satu adat
Satu budaya
Satu suku
Satu bangsa
Satu persatuan
Satu pertahanan
Satu politik
Satu ekonomi
Satu tujuan

Satu Minahasa

29/31-10-2008

==================================================

Tana Minahasa luas

Vatikan pe luas 0,4 km²
Monaco pe luas 1,8 km²
Nauru pe luas 22 km²
Tuvalu pe luas 26 km²
San Marino pe luas 62 km²

Samua itu negara kacili!

Kota Tomohon cuma 114 km²
Langowan cuma 125 km²
Kota Manado cuma 157 km²
Kota Bitung cuma 304 km²
Amurang cuma 345 km²

Mitra cuma 710 km²
Minut cuma 932 km²
Minahasa induk cuma 1.029 km²
Minsel cuma 1.409 km²

Singapura ada 585 km²
Hongkong SAR ada 1.066 km²
Brunei Darussalam ada 5.765 km²
Israel ada 20.764 km²
Belanda ada 41.160 km²

No tu tana Minahasa ada 4.786 km²
Ngoni kira kwa Minahasa cuma kacili?

31-10-2008

==================================================

Bangsa Minahasa pe basar!

Ni tana Minahasa …

Dulu …
Taong 1650 ada 24.000
Taong 1678 ada 20.350
Taong 1695 ada 23.703
Taong 1792 ada 30.000
Taong 1817 ada 58.635
Taong 1824 ada 73.364
Taong 1850 ada 96.815
Taong 1900 ada 182.704
Taong 1930 ada 308.354
Taong 1951 ada 503.929
Taong 1980 ada 1.075.708
Taong 1991 ada 1.108.184
Taong 2006 ada 1.662.254

No skarang …
Di sluruh dunia ada 2 juta ekor …

31-10-2008

==================================================

Art of heaven

Malam di sini …

Art of Heaven di TKB

Ujang turung nda ba bilang …

Heaven doesn’t have art …

31-10-2008

==================================================

Kolongan in heaven

Art of Heaven di TKB nda ta trus …

Ta sopu di Kolongan-Airmadidi
Makang pa Carly Samola pe sudara pe acara di sabla

Kenyang …

Tidor di koi ba ver …

31-10-2008

==================================================

28 taong di sini

Bangong pagi
Mama, Eming, Tanta Yeni, Nita Tumuyu ta sopu di dapur …

Popy datang babantu
Papa ani Polus da suru

Siang …
Papa ani Polus datang
Mama ani Marie baku iko nya brapa lama
Makang siang kong pulang

Sore samua so amper klar momasa
Pigi main internet 17.30-19.40 di Sario
Kase tamba blog yang baru beking
Ibadah pemuda di rumah
Pas baru abis khotbah

Langsung sambung deng kesaksian
Manyanyi kj no. … yang baru ta buka

Nya’ ada persiapan …

Blank …

Klar samua malam itu …

28 taong umur so talewat

Memori rumah jalan Sea

17-10-2008
Ta nda mo lupa

31-10-2008

==================================================

Torang samua tetap basudara

29 september
Pi ka waruga Mamarimbing di kawangkoan …
Dotu Mamarimbing deng Warokka pe kubur …
Sama2 deng Mawale Movement
Ba join deng Pinabetengan Muda

22 oktober
Pi ka waruga Wurik Sombor
Opo Wuri Muda pe kubur di Nawanua-Kaskasen …
Sama2 deng Chan Rooroh

Hahahaha…..
Warokka kote’ da kase kala tu Wuri Mud ape pokos-pokos!
Padahal qta keturunan dotu Warokka …

Ahhh …
Mar torang samua tetap basudara

31-10-2008

==================================================

Halloween night

01.30 pagi
Ni malam Halloween …

Khhh …
Kalu di Minahasa banya lo’lok, pokpok, songko’
Babajalang tiap malam …

31-10-2008

==================================================

Si tou timou tumou tou

Pesan Dr. Sam Ratulangi
(dorang bilang …)
SITU TIMOU TUMOU TOU …!!!

Hari ini, tanggal 7 Juni 1995
Saudara Agi Supit kembali ke hadiratNya …
Tanah kembali kepada tanah …
Debu kembali kepada debu!

Dengan terkuburnya Agi’ Supit
Maka so takubur tu Sitou Timou Tumou Tou deng dia …!!!

1-11-2008

==================================================

Kontemplasi Kolongan

Manado-Aermadidi 6000 pera
Makang malam 20.30 ada 2x tamba

Blog ada brapa lei mo revisi
Buku Tokoh Minahasa masi jao dari harapan
Slagbom Samola bole stou mo dapa?

…
…
…

1-11-2008

==================================================

Qta orang Minahasa

Qta orang Minahasa
Maesaan – persatuan Pakasaan

Qta orang Amurang
Amurang – Tontemboan asli

Qta orang Tontemboan
Tontemboan – orang yang balia ka jao dari atas gunung

Qta orang Poopo-Minsel
Tape dotu Menayang da kase badiri

Qta orang Kawangkoan Bawah
Tape dotu Mamarimbing deng Warokka jadi depe pioneer

Qta pe fam Talumewo
Talumewo – perusak deng panjaha
Parusak deng panjaha Cuma for torang pe musuh
Talumewo dotu dari Langowan

Qta pe mama pe fam Poli
Poli – punya hati suci
Poli dotu dari Kanonang

Tuama asli Minahasa

I yayat u santi!

1-11-2008

==================================================

Napa Minahasa tape kebanggaan!

Lumimuut tape tuur
Putri mahkota dari utara!

Pingkan-Matindas
Dabunung tu raja Dodi Mokoagou dari Bolmong!

Opo Lumi Worotikan dari Toumuung
Kase kala tu Tasikela taong 1644!

Qta pe dotu Mamarimbing dari Tongkimbut
Da kase kala tu raja Loloda Mokoagouw dari Bolmong taong 1693!

Opo Lengkong Wuaya dari Tonsea
Da kase kala tu orang Bantik taong 1600an!

Qta pe dotu Warokka dari Kawangkoan
Da kase kala tu Wurik Muda taong 1700an!

Tewu-Matulandi-Lontoh Tuunan dari Tondano-Tombulu
Da malawang paorang Blanda taong 1808-1809
Orang Blanda tako pa dorang!

Tololiu Dotulong-Tawalijn Sigar-Werias Supit-Bambo Palar
Da tangka tu Pangeran Diponegoro taong 1830!

Kembi dari Woloan
Da tangka tu Imam Bonjol taong 1837!

Luitenan Jesajas Pongoh dari Tonsea
Da tembak mati tu Teuku Umar taong 1900an!

Sersan Rotikan
Da tembak mati tu raja Si Singamangaraja XIII taong 1907!

Majoor A.L. Waworuntu dari Sonder
Da hina tu residen Manado taong1892
Dorang lebe rendah derajat dari orang Minahasa!

Letkol Adolf Lembong dari Ongkau
Beking tentara Jepang di Filipina totofore
Waktu dia perang gerilya taong 1943an!

Kolonel Alex Kawilarang dari Tondano
Depe anak buah da tembak mati tu Jenderal Spoor di Tapanuli taong 1949!
Panglima Besar Angkatan Perang Permesta taong 1958-1961
Dihormati kawan, disegani lawan, ditakuti musuh!

Panglima Kolonel Joop Warouw dari Remboken
Da beking tako tentara Sekutu-NICA di Jawa Timur sekitar taong 1947an!

Letkol Chalie Taulu deng tamang-tamang
Da kudeta tu NICA-Belanda Manado taong 1946!

Panglima Ventje Sumual dari Remboken
Beking tako Tentara Pusat deng depe Permesta taong 1958an!

No blum lei ini:

Qta puya Dr Sam Ratulangi
Pahlawan Nasionalis Indonesia
Bapa orang Minahasa!

Qta punya Walanda-Maramis
Yang lebe butul dari R.A. Kartini
Yang lebe pande dari R.A. Kartini
Yang sama pande deng Raden Dewi Sartika!

Qta punya Arnold Mononutu
Yang berjuang for Indonesia dari nol basar!

Qta punya Arie Lasut
Pahlawan Nasional Indonesia!

Qta punya Kapten Anumerta Pierre Tendean
Yang da kase selamat tu Menhankam Nasution – musuh orang Minahasa itu!

Qta punya Mr AA Maramis
Yang da susun tu pembukaan UUD 45

Qta punya Prof SJ Warouw
Perdana Menteri NIT yang
Berdarah federalis!

Qta punya banya opa
Yang baulang kali jadi menteri RI!

Qta punya Ir Herling Laoh
Yang jadi menteri RI 5x!

Qta punya Ds Wim Rumambi
Pendeta satu2nya yang jadi menteri RI!

Qta punya Marie Thomas
Wanita Indonesia pertama yang jadi dokter

Qta punya referendaris Philip Sigar
Sekretaris Keresidenan satu2nya masa Hindia-Belanda
Kong cuma lulus SD lei!

Qta punya Mr Annie Manoppo
Parampuang Indonesia pertama yang jadi Sarjana Hukum deng Rektor!

Qta punya Tine Lumentut
Parampuang pertama di dunia yang jabat kedudukan setingkat uskup agung!

Qta punya Sam Mangindaan, John Malonda, Jan Timbuleng, No’ Korompis, Lep Malonda, Piter Tumurang, Thomas Najoan, Jacques Pangemanan
Para pemberontak Minahasa itu
Contoh for torang generasi muda bagimana sebenarnya kalu mo berontak!

Qta masih punya tamang2 …
Yang mo jadi sama deng dorang, nanti …
Yang mo kase trus dorang pe kebanggaan …
Yang mo warisi tu kebangaan bangsa Minahasa
Bangsa yang qta punya!

Tamang2 yang mo beking bangsa Minahasa tamba basar depe derajat …

I yayat u santi!

1&4-11-2008

=========
Biar qta pe puisi pe besae mar ada bos!

===================================================================
"Tabea Waya!
Bangsa besar adalah bangsa yang menghargai para pahlawan, kisah dan kedudukan kaumnya di sepanjang masa!
Minahasa adalah bangsa yang basar! Karena itu hargai akang torang pe Dotu-dotu deng samua yang dorang kase tinggal for torang!
Pakatuan wo pakalawiren!
Sa esa cita sumerar cita, sa cita sumerar esa cita! Kalu torang bersatu torang musti bapencar, biar lei torang bapencar torang tetap satu!
I Yayat U Santi!"
===================================================================